صوت وصدى بين عملاقين من عمالقة الشعر في وقتنا الحالي
خلف المشعان و حسين البليهي
فكره بسيطه عن أسباب الرديه بينهم : هو أقامة أمسية شعرية في حفل زواج الأخ الأصغر للشاعر حسين البليهي في مدينة عرعر وقد قام البليهي بدعوة أحد زملائه الشعراء فكان زميله يفاوضه على السعر والفلوس كي يحضر لإقامة الأمسيه ( وهو حق من حقوقه ) ولكن ذلك أثار حفيظة حسين فقام بالأتصال بالشاعر خلف المشعان والذي يسكن مدينة الرياض ودعاه أيضاً ليكون الطرف الآخر في الأمسيه وقد أخبره ما كان بينه وبين زميله الآخر فلم يكن جواب أبوموسى إلا كعادته ( أبشر بعزك ) مع العلم أن يوم الأمسية يتعارض مع الدوام وأيضاً كان قبل الراتب بيومين ( يعني أزمه للي يبي يسافر ) والسياره فالورشه والعين على عرعر حوالي 1000 كم ولكن كل هذا لم يعيق خلف المشعان عن الحضور وقد ألقى هذه
القصيده
هبـت هبـوب الطيـب يامـدور الطيـب = وأنـا مـع أهـل الطيـب هـبـت هبـوبـي
جيت أكمـل الفرحـه بعيـن المعازيـب = مـانـي مخـيـب هـقـوة الـلـي هقـوبـي
أغيب وأفصل عن دوامـي ولا أغيـب = عن فرحة اللي لا حضرت فرحوا بي
أهــل الحمـيـا والـكـرم والمواجـيـب = مالـي عـذر عـن لابـتـي لا أنتخـوبـي
تـعـب عـلـى دربً يجنـبـنـي الـعـيـب = أخـيــر مـــن دربً يـبـيــن عـيـوبــي
ما كنـي ألا الزيـر فـي حضـرة كليـب = يـوم البليهـي وجــه الـهـرج صـوبـي
قال أنت ولا الذيب قلت يخسى الذيـب = فصّل وأنـا ألبـس ليلـة العـرس ثوبـي
وطبعاً بمـا أنـي واحـدً مـن المعازيـب = بعـد الشعـر دحـه وشوطـيـن جـوبـي
وكان رد حسين البليهي لخلف المشعان فا
اليوم الثاني عبر الجوال وبصوت العريس نفسه
ياخليف صوّت بالعشا واطعم الذيب = والاّ مـن الفدعـان مانـت محسوبـي
ربـعٍ نشامـى بـس بلاهـم عذيـريـب = كفـوفـهـم عـــن الـكــرم ماتـتـوبـي
ربـعٍ تسابـق وتْـزارق علـى الطيـب = يـوم الـردي للطـيـب كـفـه هيـوبـي
صوبتـهـا صوبتـهـا علـهـا تصـيـب = للشاعـر الـلـي بالقصـايـد صيـوبـي
يامرحـبـا بــه عــد ماحـنّـت النـيـب = وعـداد ماسـاق السـحـاب الهبـوبـي
وعداد راسي ماتغطرف بـه الشيـب = وعــداد مـافـظـن يـديـنـي جـيـوبـي
وعداد ما أذنب وارتكب بالخفا عيب = وعـداد مــاالله سـاتـرٍ لــي عيـوبـي
ياعل شمسك ياأبيض الوجه ماتغيب = وشمـس الـعـدو ياعلـهـا للغـروبـي
مابينـنـا ياخلـيـف شـــكٍ ولاريـــب = وعــن البليـهـي والـبـلاهـا تـنـوبـي
اقلـط وصـوت بالعـشـا للمعـازيـب = والاّ من المضْيـان مانـت محسوبـي
آخر المواضيع
خلف المشعان و حسين البليهي 
