اصحابٍ تغدر اصحابها

ياليل مادامك ضويت وجيت فارحب لاضويـت=غير الهموم اللي معـك ياليـل ويـش ابغابهـا
قد لي ثلاث امرار وانـا كـل ماشفتـك لفيـت=سلمـت نفسـي للهمـوم جبـاريٍ وارضابهـا
ادري كذا طبعك مـع العالـم لكنـك مادريـت=انك نسيت البعـض منهـم ماطرقـت ابوابهـا
انا لونّـي مثـل ابـن هـذال ولا بـن نحيـت=كان البيوت الغامضـه عرفـت كيـف ابدابهـا
لاكن بوضح ذا القصيده كل شطر وكـل بيـت=حتـى يفسرهـا الفطيـن منـيـن ماغنابـهـا
وردت لي عدٍ وانا ضميان وابغـى لـي مبيـت=وحصلت ناسٍ تشرب ونـاسٍ ملـت مشرابهـا
فاخذت منـه مايبـل الريـق لاكـن مارتويـت=عدتنـي مـن العـد قـومٍ وقفـت بحرابـهـا
فكضمت من مابي على راس البهام ولا حكيـت=لأن اليـال السـود قدمـي كشـرت بنيابـهـا
الله اكبـر يازمـان الغـدر والحـض المميـت=عـز الله انكـم فزعـةٍ فالضيـق مايغزابـهـا
خلقت في الدنيا على احسن حال لاكن ماوعيـت=الا وانـا بيـن الأسـود الجائـعـه وذيابـهـا
والله اكبـر يارفيـق الأمـس ماضنـك نسيـت=حتى تجاهلت الجمايل فيـك وانـت ادرااااابهـا
عزالله اني خاب ظنـي فيـك وانـي ماهقيـت=ان المصايـب ياقليـل العـرف انـت اسبابهـا
عديتني والعد جمه وانـت ماعمـرك ضميـت=حتى تعرف ان الضمـى لانـاش كبـدٍ ذابهـا
لاكن بقول الله يجـزاك بخيـر كفيـت ووفيـت=ولابـد مـن سـود اليـال تنوشـك بمخلابهـا
ياعد ليييه الناس رويت منـك وانـا مارويـت=ولا على قول المثـل ( لاول غبـش واقفابهـا )
انا بعد عنـدي مثـل يقنعـك دامـك ماكتفيـت=ترا المثل قد قال ( اهل مكه تعـرف اشعابهـا )
وانا ضويت وجيت وأدر اني ليا منـي ضويـت= يعني ضويت ( اما بهـا ولا بقطـع الرقابهـا )
ياليييل قصت حزن عنوّنها ليـا منـك سريـت=من بين قوسين اكتب ( اصحابٍ تغدر اصحابها )

وانا ضويت وجيت وأدر اني ليا مني ضويت=يعني ضويت ( اما بها ولا بقطع الرقابها )
ياليييل قصت حزن عنوّنها ليا منك سريت=من بين قوسين اكتب ( اصحابٍ تغدر اصحابها )