نصيت العسكريّه يـوم قالـوا للنظـام رجـال

الا يالله عفـوك لا معـي بيجـر ولا جــوال=ولا عندي وضيفـه والتجـاره فاشـلٍ فيهـا
ولاعنـدي شهـاداتٍ ولاحرفـه تسـد الحـال=ولا حـظٍ كبيـر لا اخطـت الجـره يقديـهـا
مخابي الثوب تومي مادخلها من زمـان ريـال=بها فاتـورة الكهـرب ولا يمدينـي اقضيهـا
علىذيك العراوي تتعب الحادي مـع الجمّـال=ثلاث اشهـور فالورشـه وشهريـنٍ مغطيهـا
ابيها لو تجمّل يـوم واجلبهـا علـى الـدلاّل=يجيها واحـدٍ حظـه مثـل حظـي ويشريهـا
نصيت العسكريّه يـوم قالـوا للنظـام رجـال=وقدّمـت الملـف وصـورةٍ متشخـصٍ فيهـا
خذا الاوراق مني واحدٍ مـا عنـد ابـوه د لال=السلوم الناس واهل المعرفه والطيب مخطيهـا
قراها في دقيقه والتفـت عجـلٍ علـي وقـال=شهادتك العظيمه يا ولد ويـن انـت مخفيهـا
هزّيت الراس ماعندي تقول اني مـن البنقـال=وقمت احـب خشمـه واطلبـه بالله تمشّيهـا
حذفها من يده شين الطبيعـه والنبـا والفـال=وقال ازيـن تعـوّد صـوب نوقاتـك تعشّيهـا
تناوشته من الكرسي وعفت الحـل والترحـال=وضربته بالبياله عقـب مـا بيّحـت شاهيهـا
خذوني للسجن لا نيـب لا ظالـم ولا محتـال=مجـرّد واحـدٍ جـا يكحـل عيونـه فيعميهـا
ويوم اني خرجت اقفيت لارض الله وسيع الجال=علـى بـرٍ هـواه يـداوي العلّـه ويبريهـا
ادوّر قصعة الجربوع والظـب الفتـي يختـال=والارنب يا شفاة الروح ما احلاهـا وطاريهـا
بـلا كهـرب ولا بيجـر ولا غـازٍ ولا نقّـال=قوانين الحضـاره لا تبـي شوفـي ولا ابيهـا