بسـم من بسط سبع ورسـى جبالها

بسـم من بسط سبع ورسـى جبالها=وسبعٍ رفعها فوق وأرسـى كمالها
ربٍ بحكمه كوّن الكون والقدر=وأعلى الدروب الصالحات وهدا لها
إلـهٍ بتقديره وتدبير قدرته=نفوس الخـلايق تحـت حكمه آجـالها
بديت وتمادى هاجس الفكرواعتبر=من ايام وسنينٍ تقافت ليالها
وحللت بالمعنى على كل ما طرا=واخترت من صعب المعاني جزالها
والى انشرح صدري وهاضت قريحتي=ترطن بلهجات ٍ صعيبٍ جدا لها
وإن صعّب المعنى على البيت وألتوّا=واحتد معناها عليه استوالها
والى سرّت بالفكر في ليلة الدجى=بانت مناهجها وناصف هلالها
وبعد ماابتديت افضيت عما بخاطري =ودارت بي افكارٍ بعيدٍ مجالها
درست التجارب وشرحت لي ظروفها=ومن جرب الدنيا عرف ويش فالها
سنينٍ تبيّن لك محبك ومبغضك=وتعطي حكيم الراي سرّ إحتمالها
توفي مع الوافي وتوفيه بالعهد=وتخون من لا يقتنع في خيالها
كم من عقيدٍ وكم شجاعٍ مجرب=خانت به الدنيا وهو قد صفا لها
ولو أمهلّت الأيام في طولة العمر=لا بد من يومٍ اتقافى رحّالها
احدٍ تزيّن له عقب ما تكدرت=وأحدٍ تكدر له عقب صافي زلالها
والرابح اللي مكسبه طيب النبأ=والخاسر اللي غرّته في جمالها
والأنذال مبلغ راس مالٍ من الدهر=والأجواد عز نفوسها راس مالها
وترى للواحد رزقٍ لا كبه ادركه=وله قدرته لو ما عنت له عنا لها
وترى المال مهما زاد همه يعادله=وكل ما طغت نفسك يزيد إنشغالها
ولا لك سوى ما اعطيت وابليت وانتهى=ومستقبلك بحفرةٍ تحت جالها
ومستقبلك يبنيه لك صالح العمل=لا جات حياةٍ ما يحدد مجالها
وترى العمر مثل الفيّ يمدي وينتهي=مع الوقت مثل الشمس حزة زوالها
فأبغى انصحك لا تغريك الايام لو صفت=تراها ولو زانت سريعٍ زوالها
وابغى انصحك لا تنصح مع كل من هرج =ولا تقتنع في رآي نفسك لحالها
و نفسك لا جارت عليك الليالي=فلا تشتكي للناس مما جرا لها
شكوى لغير الله من الناس ضايعه=واللي خلق الأنفس ضمن رزقها لها
ولا تزعم أشياء ما أنت تقدر تنالها =ولا تحتقر نفسك وتطرح جلالها
ولا تبدي برايك على غير طالبه=وناس في غنى عنك مالك وما لها
وعرضك وفرضك وارضك أغلى من العمر=ثلاثٍ تهوّن الروح لاجا الحكا لها
ولا تحسب إن السبّ والهرج في القفى=بتخطى على من تكلم اقبالها
توقع رد العلم منك لصاحبه=وتفتح بنفسك باب درب الردا لها
ولا تحسب إن مدحك لنفسك يعزها=تجمّل وخل غيرك يرد الثنّا لها
ولا تحسب إن ما عاد عقب الدرك فرج =ولا تشّب نار ولا تصالي إشعالها
وبنت الرجال الى تقصيت للنسب=أسأل من قبل عمها عن خوالها
ولا تطيع النفس ويغرّك الهوى=تجي عواقب حالتك ينرثا لها
ونفسك على ما فاتها لا تلومها=ولا تشغل انفاسك على ما طرا لها
وكلمة يا ليت ولو على كل ما مضى=ما يستفيد من ذكرها من لجى لها
خلك حليم وخل نفسك عزيزه =واصبر على ميل السنين وعدالها
والى جفتك الدار واللي يرودها=فأبعد خطاك ومدّ باب الرجا لها
ما هي تضيق إلا على اللاش والردي =والنفس لو دامت يزيد إنشغالها
وفي مجلس العقال لا تصير جاهل=ولا تحتقر نفسك وبداية آمالها
عط كل وقت حسب وقته وحزته=تكسب رضى من لا ينال الرضى لها
ومن ساعدك في موقف الضيق واسعفك=فلابد وقفاته يرد الجزا لها
و رد الجميل يضيع من غير صاحبه=والأنذال لا يبتدى ولا ينبدا لها
ولا الكايدة تجلا على كل محتمل=ولا كل رجلٍ لا بدت ينتخا لها
ومن طلب الأسرار منك يذيعها=وترى من حكى في الناس عندك حكى لها
والرجل ميزانه لسانه ومنطقه=يوضع الإجابة قبل يطرح سؤالها
وفي كل دربٍ لك خوّيٍ يرافقك =وجليس نفسك ينظر له والولا لها
ومن لا حكم نفسه وحكّم مصيرها=ما الناس ترفع عنه باقي خمالها
خلك فهيم وميّز السرّ بالجهر=ترى غيب الأنفس تنكشف من أعمالها
وغلطة رفيقك لا تجازيه بمثلها=والا العدو له ضربةٍ لا دوا لها
ويسراك عن يمناك ما تقضي الغرض=ويمناك تراها ما تصفق لحالها
ورجلٍ بلا ربعٍ عزومه رديه=ورجلٍ بربعه دعوته ينعنا لها
ورجلٍ لتقديره تقدّر قبيلته= ورجلٍ يشوّه سمعةٍ ينتما لها
فلا جا جديدٍ إلا مضى عنه سابقه= ولا فاتت اشياء إلا تعوض بدالها
فإن كان تبغى موقفك يندرابه= ونفسك على العليا تفادي بحالها
ترى سيد الخصال ثلاث خصايل= ينال الفخر من جات له واعتزا لها
الأوله ينطح شبا كل عايل= والمرهفات اللي عراضٍ سلالها
والثانية غيثٍ لهشال في الخلا=لا جات مناكيبٍ اتسارج حبالها
والثالثه مفراص صلف محنّك= حلحيل يقدر لحجته لا استمالها
وخاطي غمرٍ تجتمع فيه كلها= واتشوم له الى انتهض وارتكى لها
ووصاةٍ بعز الجار والضيف والخوّي=سلوم وسـبقـنا من ذكرها وقالها
ويا كثر ميزات الرجوله ويا هونها= ويا عسرها عند الذي ما احتسالها
فيا سامع أقوالي تقبل نصيحتي=تلقى الطريق الصح في شرحنا لها
وأنا ترى في بعض الأشياء مقصر=لا شك نكسب حسب مقدورنا لها
أقوله وأنا من روس ربعٍ لها الشرف=لا دار من بين المجالس مجالها
هل العز والناموس والجود والكرم= سلاطين يام اللي يعود الوفا لها
عزاز الجناب مطوعة كل عايل= وهل وقفةٍ ما كل رجلٍ ينالها
أقوله وتشهد لي قدايم افعولهم= والأقوال ما يشهد لها إلا أفعالها
يشهد ليام من داره غزت له= ويشهد لها من في وطنه غزا لها
غارآتهم بنحورها تآرد الخطر= وإن دبرت ترسي مراسي جبالها
ويشهد لحاضرها جميع القبايل= ويشهد لها التاريخ في اللي مضى لها
قصيرهم يرقد بنومه ويهتني=في ظل يام اللي يظلل ظلالها
يمشي وهو في راس جبالٍ منيفه= وتنام عينه قبل طول العنا لها
والضيف له ترحيبة ٍ تفتق النظر= وخلجٍ على شانه تنحر عيالها
ومشاهدٍ يرتاح لها طيب النبأ= ومزعفراتٍ ما تركد دلالها
وأرواحهم دون الخوي يرخصونها= وسلومها في الضيف صعبٍ منالها
وأقصاهم أدناهم الى ردوا البرى= وغرّامةٍ برقابها وبحلالها
هاذي عوايدهم وهاذي اسلومهم= ربعٍ على الطالات ترهي حبالها
وديّارهم من سار فيها تسيّره= في ظل أراضيها وهيبة ارجالها
شرقي جنوب حدودهم (طيبة الأسم)= ومقطع جبلها من علاوي رمالها
وحدودهم من غرب جرّ الثويله= وعروق رمحٍ حدهم من شمالها
وحدودنا من صوب قحطانٍ بيّنة=معروفةٍ من يوم رزت جبالها
ومن شرق مااحدٍ في القبايل تحدهم= ولا به حدودٍ بيّناتٍ أمثالها
جنوب (يبرين) وشمالي (دوامر)=في ديرةٍ يحسب لها من مشى لها
يرعون فيها كل ملحا نظيره= وتسمن بهم ضربٍ ما خانت هزالها
كم من عقيدٍ وفارس ميّلوا به=لعيون من ملحمة اللي برى لها
لا قادت الزعجول الأول وروّحت= تزهى جنايبها وتزهى عدالها
في مرتعٍ مااحدٍ رعى فيه قبلهم=إلا المها واللي تربي غزالها
يا جاهلٍ عنهم ترى ذي حدودهم= ديرة بني عمي ذرى من وزا لها
هي عزنا اللي نبدأ فيه وننتهي= وهي سورنا ان قيل رد البرى لها
ومن غير تقصير في حق القبايل= فيما ذكرنا من ربعٍ وافياتٍ خصالها
لا شك ربعي واتنومس بزودهم= وبأفعالهم نعتز في ذكرنا لها
ومن كان عنده في كلامي معارضة= ذي بندقي للي بيطرح عدالها
ولا خير في من قال قولٍ ولا اثبته= ولا اجزا معاني كلمته يوم قالها
وكلٍ يقدم ما قدرت به قريحته= وأنا عطيت من اللي الله عطى لها
وختمت معناها على خانة الميه= ونقدتها نقد الطوابع لريالها
وحددت معنى هاجسي واختصرته= وهي عاد هي يوم ابتدت وابتدالها
وما قلّ دلّ وزبدة الهرج ما وفى= ويكفيك من كثر المعاني جزالها
وتمت وصلوا على سيد البشر=عدد ما سمر برق الحيّا في خيالها