معلقة الحقباني طير شلوى (ألا هبي..)

ألا هبي بصحنك واصبحينا =ولا تبقي خمور الأندرينا
بديت ببيت من أبيات جدي =وغيري للجدود مضيعينا
أنا البارح قضيته بالتفكر =بمجد فات في غبر السنينا
بمجد في يدين التغلبيه =وتشهد به جموع العالمينا
أراجع صفحة الماضي بقلبي =وأشوف أفعالنا كالفرقدينا
فعول مادخلها كذب كاذب =ولا جاها لفاق ملفقينا
ولا جاها مثل هذا وهذا =وكل خابر مرسى السفينا
فعول بيض وقت الجاهليه =قبل بعث النبي طه نبينا
قبل يبعث وبعد البعث حنا =كتبنا العز في أعلى الجبينا
بخلي مجد ما قبل الرساله =لأنه في الكتب ماهو دفينا
لأنه في الكتب واضح مؤرخ =سواليف تغيض الحاقدينا
سواليف الأمير كليب وايل =وأخوه الزير ذباح السمينا
والأخطل وابن كلثوم المشبب =وسيف الدوله الحمدان فينا
ابترك وقتهم وابدى بوقتي =وأقول اللي بجوفي من سنينا
ألا يا نعم يا صبيان تغلب =وتغلب جمعها ما له قرينا
ملينا نجد والحد الشمالي =وحتى من ورا احدوده ملينا
جميعاً نلتحم في لاد تغلب =جموع لازهمناها تجينا
ولكن نجد واللي عاش فيها = غدوا بالدوسريه من سنينا
بحلف جابه العرعير جدي =بوقت جاه زايد والضعينا
فقول الد وسريه ما وجدها =سوى العرعير جدي با ليمينا
وكل شاهد بالقول هذا =ولا ينكره رجال فطينا
وترى طول الشبب هو طولة لي =وقصدي واضح للسامعينا
وساس الدوسريه حول خمسه =قبايل تغلبيه بينينا
أبخذهم قصص ببدي بروحي =عسى الله يكتب الخيرة يعينا
نعم يا لابتي لاد العياضي =ليا ادانت تزيد الدين دينا
نرد الكيل كيلين وفيه =وينقص كيل عادينا علينا
ويشهد برك في قولي ويومه =ومخضار وجرهَّ شاهدينا
خذينا بعشرتنا حول ميه =بشيخان العدا قمنا ابتدينا
تلايم ضدنا جمعين لكن =خذيناهم يسار مع يمينا
وصدوا كل جمع فيه وجعه =بكبده ينغبن منها غبينا
ومشوط من جنوب جاك عادي =يبي يكسب سواة الكاسبينا
وساق البل وابن شيبان يلحق =نعم ياحمود رد أم الحنينا
نكس بالبل وخلاهم جثايا =كنخل منقعر ميت سنينا
جميعا موتوا ياكون مشوط =ترك مكسور مغبون حزينا
ومثله مزيد ضده زمانه =جويع جاك يبغا يغتذينا
معه من لابته تسعين حايف =وكل حافله هجمه بحينا
لحقناهم ثمنيه واشتبكنا =بهم وسط اليتايم وامنينا
وجينا بالجهام مدورجينه =وعلوان وربعه سالمينا
ولنا وسط الحسا هيه مريه =حكاها الأجنبي قبل البطينا
غدا عفاس من ربعي نعامه =وأبوليلى وربعه كالعجينا
ولنا أكبر عطيه جات تذكر =عطيناها آل زايد با لسنينا
وهي ياسامعي بيض اللهايد =ويومنا عطيناها عطينا
من العرعير للملطوم زايد =فزايد عقبها منا وفينا
وفلقتنا سرت بين القبايل =مثل سايد ومشهور حسينا
تسمى فلقة الحقبان لامن =قرن عازة وصارت عازتينا
ونعم بالمصارير الضواري =هل عشر خذوها باليمينا
اهل عشر تعلاها ذيابه =بكون تاه فيه المعتدينا
تقاضوا في ولد عشرين شايب =وقالوا من طغاهم ماقتضينا
وابن عبود حول به مضرا =طليفيح زبون المجرمينا
خذا الفنجال ثم سما وشربه =وهو قد كاد ناس حاضرينا
وفعلا يوم شربه ماتردا =ألا ياهيه يا فنجال صينا
وشلفا حزام كل قد سمعها =وكثر بفعلة حزام الرطينا
وابن الأعمى محمد با لخفيسه =وابن راحان في جنبه عوينا
عدو ورد الملازم بالغصايب =معالقه لجا اللازم تبينا
تعزوو ثم وردوها وأهلها =على جال الهجال محور بينا
فنعم وافي لاد الحبيبي =فهم بين التغالب الأقربينا
جميعاً في علي يرجع نسبنا =فماجد منهم وعياض فينا
وثالث لابة في التغلبيه =ينو مسنا نباها لاحكينا
لها بالوقت تاريخ وفعايل =لها السلطان والعز المكينا
وهي ياسامعي لاد العميري =عمور مجدها ماله ثمينا
لها ديره ألا ياكيف ديره =تضم يسود والديره عرينا
لفا الفيصل وتسع ألاف جيشه =يخرب كل ديره مايلينا
ولا رده يكون عمور تمره =بوجه بوجه ماحطوا كمينا
وكل شاهد بالقول هذا =كما الهذيه بروس الشاهدينا
فنعمٍ ياعمور التغلبيه =بني عم يجيها مايجينا
تعز الجار ماترضى هوانه =وكل بالجعيري خابيرينا
حشد واستاق جيشه صوب ليلى =يبي ابن الصباح المستهينا
وخرب مشرف قصر الصباحي =فزع في فزعته دنيا ودينا
ولا لبن الصباح إلا التحسر =يترجم حسرته بدموع عينا
ومني للذي راحو وشاخوا =بدار أجناب جاوك شايخينا
وهم ياسامعي لاد الخييلي =ولا يعتاز تبين المبينا
وهم خيالة الشرفا وأهلها =ومدحتهم ترى حق علينا
فنعم يامخاريز الرماحي =أهل سيف وأهل حربه سنينا
أصد بعبرتي لامن طرتلي =ديار كانوا فيها نازلينا
ديار في الحزم وابو خياله =عدوده من يسار ومن يمينا
وخامس لابة في التغلبيه =مشاوية لها القاسي يلينا
قبيلة أفتخر لا قلت عنها =قبيلة اصلها منا وفينا
ترى المشوي يعود للعياضي =وذا قول الرجال المقطبينا
فهذا حن ياصبيان تغلب =سوالفنا تجدد كل حينا
سوالفنا لها الشيخان تطرب =وتطربنا وتطرب سامعينا
تنومسني سواليف قدايم =تنومسني سوالف الأولينا
ليا من آنتهى جيل بطيبه =تجيك أجيال عقبه مقتفينا
تجيب الطيب الأول ثم تزيده =كذا الطيب يورث طيبينا
وقصير البيت ناسم له عصاته =ويمسي وامن مع وامنينا
بدعنا السلم هذا وانتبعنا =فمتبوعين ماحن تابعينا
تسلسل ساسنا من راس علطا =عرب وأ صل العرب حنا وأبينا
وختم القاف صلى الله وسلم =على طه رسول الله نبينا