مقدمة :
قرأت في جريدة الشرق الأوسط ( منتدى الكتاب ) .. تعريفاً لكتاب بعنوان ( أحب بندقيتي أكثر منك .. أنثى في الجيش الأمريكي ) مقتطفات تحمل طابع المذكرات الخاصة بمجندة أمريكية خدمة في الجيش الأمريكي في العراق !
**
وكان من ضمن تلك المقتطفات : ( هناك عراقيين طاردوها وحاولوا مغازلتها ، ولكنها أقنعتهم بأنها ملك لصديقها الفلسطيني في أمريكا ؟!! قالت ذلك عمداً .. لأنها تعرف أن العرب يحترمون زوجات وصديقات العرب الأخرين !! ) << خشة تغمز .. وتقول ايه هين !!
**
وقالت أيضاً : ( كانت هناك نشاطات جنسية بين جنود وجنديات .. وكانو يشترون الفودكا من عراقيين يضعونها في جالونات !!) << ياخوفي انها تقصد العرق وما أدراك ما العرق !!
**
واخيراً أوضحت أنها تعترف بالمشاركة في تعذيب سجناء عراقيين !! ( مستانسه هي وخشتها ) !!<< عليها من الله ما تستحق !!
**
الموضوع :
أنا شاب يافع << بس منيب نافع !
انهيت دراستي وتعليمي .. ولا لقيت من يضفني .. أو يحتويني ! ( وجه خانقته العبره ) !!
فأنخرطت في مجال البيع والشراء .. لعل وعسى أن يفتح لي باب من الرزق الحلال!!
^
^
قضينا من لغة الأدب .. وبندخل في لهجة الاقلاع !!
وعقب فترة من بيع الشاهي الأخضر ومطارد البلدية !!
قدّر الله علي وتعرفت على شيطان من شياطين الإنس .. واقنعني اني أترك بيع وشراء التمر ونعناع المدينه والشاهي الأخضر على طريق الملك فهد وأبيع وأشتري وأضارب في سوق المخدرات ( فرع النسيم ) ! وأقنعني ان مافيها شي وان الحلال هو ما حل في يدي !! << نعوذ بالله من ذلك !
**
دخلت في سوق المخدرات والأمل يحدوني ( وجه واحدن مستانس بكلمة يحدوني ) ... ولقيت ان شغل التوزيع والبربسه ما يخارجني ( كل الزباين خرجين سجون وطفارى ) يعني ممكن في أي لحظة .. واحد منهم يصفقني وياخذ بضاعتي زي برّاد أبو أربعه !!
قلت خل أخربها وأدخل في مجال التهريب .. واخترت منطقة الشمال عشان اذا ضاق صدري أو تعبت من الشغل ازرق سوريا واستانس مع كرم الضيافة ( النوريه ) ! << طرّاه ( فيق .. يا علووش )!
مشت معي الأمور تمام في عملية وعمليتيين .. يوم الله أراد اني أخذ عقوبتي في الدنيا .. ويجي هاك اليوم اللي يخرب فيه جهاز ( القارمن ) اللي معي وانا متوجه للشمال .. ابي حراج المخدارت !! << الله من قوة الوجه بعد .. مسوين حراج ( الله يستر لا يسوون مزاين مخدرات ) !! << طرّاه جماهير "ام رقيبه"والمهايط بالشراب والحبوب عيني عينك !!
يوم حسيت اني ضايع قلت خل ارقد والصباح رباح !!
وانا في غرقة النوم واعيش لحظات حلم وردي مافيه الا مشاهق ومماطق ( لا يروح بالكم بعيد تراي محلم اني اتروش في البرد واشاهق .. وفي أثمي حلاوة عسل واماطق بها ) !!
ما علمت وحلمت الا بذاك ( العلج ) اللي شايلن على ظهره حمولة نصف طن .. ومعه بندق! <<< ياكثر ذا القشان اللي يلبسونها جنود الأمريكان .. تحس انهم حمير مكدّه !!
سحبني ذا ( العلج ) باذني ( تسنّه قصّاب يسحب تيس في مصلخ ) << كناية عن اني قمت أصايح صيااااح يروع ( ابي كود احد يفزع معي ) !! بس ماش لا حياة لمن تنادي !
ثم فتح شنطة الهمر ( وجه واحد يسمع بالهمر ولا يدري هو له شنطه والا صندوق ؟ )
.. وربط رجلي مع يدي .. وسقطني في كيس شعير ( حركات شريطية سوق الغنم ) !! وذبني في أقصى الشنطة وصك علي !!
**
عقب ساعة من المطاااب والبطانيج .. وقف الهمر .. وسمعت صوت حرمه .. ومشاهق .. وقام الموتر يتهزهز ؟؟!! ( ذا المره منيب معلم عن المشاهق وشو منه ؟ )!! <<< وجه مستحي ويقول راجع مقدمة الموضوع !!
ثم انفتحت شنطة الهمر .. وسحبتني ذيك ( العلجة ) النشيطة وقامت تلمّس ظهري تسنّها بتشتري ضحيّة ؟!!
وفتحت خشتي تشوف سنّي ! ثم قلبتني على ظهري وابتسمت ابتسامه صفراء ! ( عليها من الله ما تستحق ) وصاحت لواحدن بعيد وقالت : ولّم الطاسه شكلنا الليلة بنغتبق !!! << قالت العرب ان معنى الغبوق هو حليب المساء .. بينما الصبوح حليب الصباح .. ولولا اني مستحي وخايف يفضحني أحد الأعراب كان فكيت عليكم وقلت ان فيه حليب عقب الظهر و نسميه " قيول " ... ( وجه يقول اذا انفردت بالمرمى اسحب الحارس ) !!
**
بغيت أسوي زحمه وأقاوم ذا العلوج !! ثم تذكرت ان ذا العلوج قد صادو واحدن ألعن منّي ولعبو في حسبته ! ولا قاوم ولا طرى عليه يقاوم !! << طرّاه يوم يصيدون (صدام حسين ) وهو تسنّه قطو"ن" أسود طايح"ن" في كيس طحين .. من كثر الشعر في راسه ووجه .. ومع هذا قضبوه باذنه وفصخو صرواله .. وفتحو أثمه وشافو سنّه !! وهذاهم الحين يلعبون عليه ( كل شوي مطلعينه على خشبة المسرح ) !!
^
^
فيه اشاعة قوية تقول ان صدام حسين موقع مع عادل امام اتفاقية عرض مسرحية شاهد ماشفش حاجه .. من جديد !!
نزلوني من الهمر و دخلت علي هاك المحققه اللي تنافس مذيعة روتانا ( هاله سرحان ) في الشين وقوة العين !! ( ناااااهيك عن تهمة مرض الشبق )..!
وطلبت لي وجبة فطور ( حنيني ) يوم شبعت و أونست الدفاء ..وصارت وجنتي خشتي وردية قربت مني وقالت : وهـ منك !! << فيه اشاعه قويه ان ذا المحققه تدخل التشات !
سألتني كم سؤال .. وهي تتحرش فيني !
تقول اذا جاوبت صح عطيتك حلاوة تلعطها ..! ( المشكلة انا متأكد ان حلاوتها منتهية الصلاحية ) ! <<< طرّاه انهم مبطين في العراق!!
وان قعدت تستهبل .. ترى باخليك مفصخ في ذا البرد اللي يقص المسمار ! بدون حنيني ولا مفروك <<< لا تستغربون ذا الحتسية من خواجة .. تراهم يتعلمون بسرعة ! ( لولا اني خايف انكم تقولون ان تسذووووب كان قلت ان نصف مجندات الامريكان في العراق جايبنهم عشان يقرصن ويطبخن ويضبّطن الفطور )
حاولت أشرح لها اني مهرب مخدرات واني مثلهم .. اشيل في يدي معول هدم للمجتمع العربي والإسلامي .. بس ماااش ما فهمت علي !! << قالت العرب ان المعول هو ما يسميه اهل نجد " العتله " وفي رواية " الفاروع " وهناك شك كبير ان المعول فحل المسحاة .. وهجينهم هو الفاروع !!
يوم شفتها صاملتن علي وتبيني اعترف اني ما جيت للعراق إلا عشان أقول لهم : لعبوني وإلا بخرّب .. !! قلت في خاطري .. هي خربها خاااربه .. خلينا نعميها !!
قلت ايه انا جاي وناوي أكسر قزاز في الملعب ( كناية عن أن أرض العراق صارت ملعب بيسبول .. واحدن يذب الشعب العراقي كنّه كورة .. والثاني يمحطهم بخشبه .. وثالث يتلقفهم وهو لابس قفاز من جلد خنزير .. والعالم تفرّج وتتابع المباراة وهي تاكل ساندويتش هوت دووق .. وتغني أغنية ذاك الخال الأمريكي القذر .. أغنية " هو لت ذا دووق أوت ... هوووه هوووه هووووه " ) !
وقعت على اعترافي .. وبصمت من زود حومت التسبد ( وجه مرتاع من الحلاوة المنتهية الصلاحية ) !!
عقب الاعتراف .. قالو لي تروش والبس هدوم جديدة ترانا بنسوي معك لقاء تلفزيوني .. ونبي ناخذ لك اعتراف مصور في التلفزيون !
قلت ابشرو والله لو تبوني اعترف في قناة ( ريل تي في ) بس تكفون ابي مذيعه ما ابي مذيع ! <<< ما ابي اتوهق مع واحدن حقنة مثل (بتّال القوس) !!
جابو ذيك المذيعة اللي لو تكح طلع من أثمها ورد .. وجلست قبالي وحطت رجل على رجل وابتسمت ابتسامه ترحيب ومجاملة لي ( تحسب عندي سالفة ) يوم تواست على الكرسي ..( طبعن بعد جهدون جهيد ... عشان قاعتها بيضاويه ورفيعه عن الأرض ) ! << وهـ منها !
قالت : بدك أحكي عربي .. وإلا نحكي انقلش من شان ما نضيع وقت في الترجمة ؟!
قلت لها : انا والله منيب أعرف عربي مره ! .. بس اني أطقطق شوي سديراوي على شوي قصيمي .. على بعض المصطلحات الخاصه بالسب والشتم من لغة الساحل الغربي !
ضحكت المذيعه .. وقالت تعرف .. انت أول ضيف مهضووم .. بعمل معه لقاء .. اوعى يكون عندك يوزر بالاقلاع ؟!! << بدينا شغل الخنبقة !!
انا يوم سمعتها جايبتن طاري الاقلاع .. قلت بس أكيد أحد مراقبين الاقلاع يموت فيني وسمع عن مصيبتي وفزع لي .. وارسل لي ذا الطخماء عشان تغري الأمريكان .. وتشتت انتباهم .. وانحااااش ! <<<< ودك الواحد ما يبطي عند التلفزيون ثم يجي يكتب موضوع !!
الحاصل اني اعترفت في التلفزيون .. وما خليت شي ما قلته ( ما اغير اهز راسي .. وابارك على كل معلومه تقولها ذا الزينه ) .. ورحت طعام جحوش .. والحين انا كاتبن لكم سالفتي وحاطها في قارورة فميتو فاضية وذابها في نهر الفرات .. اذا لقيتوها .. تكفون وصلوها للاعلام الخليجي والعربي .. وعلموهم اني برئ .. واني ما سويت شي .. واني اعترف اني مهرب مخدرات وخسيس وغبي << إهب يا وجهه !!
بس منيب محارب في أرض غير أرضي ولا نيب مجاهد بدون راية جهاد واضحه ومتفق عليها من اهل العلم والفقه من كبار العلماء ولا نيب راعي خنبقة و أرهاب .. ولا عمري فكرت اترك ديرتي عشان احارب في ارض ما ادري من العدو فيها من الصديق ( عسى الواحد يحارب ويجاهد نفسه الأمّارة بالسوء ويربي عياله على تعاليم الدين الاسلامي السمحه بس ) وتراها في ذمتكم يا اهل الاعلام .. لا تصيرون معااااول هدم في الاسلام .. نصف ميزانيّات برامجكم .. اللهم يا كافي .. مخصصينها للشعبثه والبربره وتبادل الاتهامات .؟.
دافعو عن ناسكم وأهلكم اللي كل يوم تثبت براءة واحدن منهم ومع هذا تسّن مافيه شي صار ؟!
_ ( صورة لأهل مراسل قناة العربيه اللي صكو عليه الأمريكان أربعة أشهر بدون ذنب ولا خطيئة ؟!! ,,, للإحاطة .. وعمل اللازم وتوكيل محامي يهودي .. يعرف من اين تؤكل الكتف .. عشان ياخذ المراسل حقه من ذا الأمريكان " أقل شي قطمة رز ابو بنت " ) ..
_ صورة ثانية لأهل الدكتور السعودي وزوجته .. اللي صاكين عليهم الأمريكان بدون ذنب أو جريمة بعد التأمر مع الخادمة الإندونيسية ( جعلها تطلع تكب الزبالة ولا تعود ) !!
_ صورة ثالثة .. لكل مسلم غيور يسمع ويرى أهل البقر يستهزئون بخاتم الأنبياء صلى الله عليه وسلم .. وإعلامنا العربي .. فاضي بس يتابع حالة شارون الصحية ( جعله يصاب بالغرغرينه في صفاقه ) !!
صورة لقناة فضائية نست العالم .. وسخّرت كل جهودها من أجل الحفاظ على خضرة ضريح رئيس مات ( وجه يقول المفروض المذيعين ياخذون فيزة مزارعين على ذا الشغل ) !! << طرّاه البحث في ملف اغتيال الحريري من مبدأ ( انفخ يا شريم ) !! تسن سوريا مهيب لنا ولا حنا لها ( وجه واحد يقدّر شي اسمه دبكه ) !!
انتهى ....!
آخر المواضيع
جندية أمريكيه في العراق << أسير مستانس ! 
.. 
