غاسل ٍ كفي مـن مصافحـة بعـض اليديـن = وقافـل ٍ بوجيـه اهلهـا صناديـق البـريـد
وشايف ٍ شي ٍ لي اعـوام مالـي فيـه عيـن = وقاطـع ٍ خيـط الهقـاوي بسكيـن الوكـيـد
وخالص ٍ من طيـب ضـن ٍ موهقنـي سنيـن = وظاهر لي عقب عرف العـرب عقـل ٍ جديـد
وطايح ٍ من عيني ارجال عنـدي كـان ويـن = وحاقـر ٍ منهـو يقيـس الاوادم بالرصـيـد
ومحتمي ٍ من غدر الاصحاب في حصن ٍ حصين = ولابس ٍ لرماح الاقـراب ثـوب ٍ مـن حديـد
وماضي ٍ مني علـى اللـي تمشينـي يميـن = ما تجي منهو قريـب ٍ والـى احتجتـه بعيـد
المواقـف تشخـل النـاس والطيّـب يبـيـن = كل عام يطيـح تسعـه ويصفـا لـي وحيـد
اشهد ان خيـر المـدارس تجـارب الاوليـن = واشهد ان راي التجارب هـو الـراي السديـد
واشهد انـي للبـلاوي علـى الدنيـا مديـن = كل مـا راجعـت نفسـي طلعـت المستفيـد
وانت ياللي عقبك الزين بيـن البيـض شيـن = مستحيل يطوفك الشعر وانـت اصـل القصيـد
القصيـده فـي عيونـي بدونـك مـا تزيـن = لازم ان اجيـب طاريـك يـا ملـح النشـيـد
انت ياللي مـن بطيـن الفـؤاد الـى الاذيـن = والله ان حبـك مـع الوقـت ماينقـص يزيـد
في غيابك لـك محبـه ولـك شـوق وونيـن = وفي حضورك شف عيوني كلامـي مـا يفيـد
اقهـر الضيقـه بذكـراك مـن حيـن لحيـن = وانثر دموعي على الوصل مـن عيـد ٍ لعيـد
لك غلا ً سبحـان ربـي ملـى الدنيـا حنيـن = ولك وفا ً سبحان ربـي مكـن فالكـون غيـد
شف مكانك فـي مكـان ٍ عـن العالـم دفيـن = في مكـان ٍ مـن ورى مثـل عيـدان الجريـد
مكرم ٍ حبك ولـه فالحشـى سمـن وسميـن = يقدع مـن الحـال واصـب لـه بـن الوريـد
افتضحت مـن الهواجيـس بـك فالمسلميـن = كل من سولف علي قلت له وش قلت؟ ..عيـد
الهوى سجن العشاشيـق وانـا لـك سجيـن = وودي ان سجني مؤبـد ولـي حـارس وقيـد
عزتي لي مـن فراقـك عسـى ربـي يعيـن = ادري انه فـي طريقـي ولـو وصلـك مديـد
صابر ٍ غصبا ورى الخشم لو جرحـي مكيـن = ودي افعـل لكـن الله يفـعـل مــا يـريـد
الشاعر: محمد بن حمد
من أختياري
فـــزو لهـــــــا
آخر المواضيع
(( ملــــح النشيــد )) 
